Námsmat í Vesturbæjarskóla
Mat á hæfni og framförum nemenda er reglubundinn þáttur í skólastarfi og órjúfanlegur frá námi og kennslu. Megintilgangur námsmats er að leiðbeina nemendum um námið og hvernig þeir geta náð markmiðum þess. Með námsmati er fylgst með því hvernig nemendum tekst að ná almennum hæfniviðmiðum aðalnámskrár, stuðla að námshvatningu, nemendur örðvaðir til framfara og metið hverjir þurfa á sérstakri aðstoð að halda. Námsmat á einnig að veita nemendum og foreldrum þeirra og kennurum upplýsingar um námsgengi nemenda, hæfni þeirra, vinnubrögð og framfarir, sem m.a. má hafa að leiðarljósi við frekari skipulagningu náms.
Tilgangur námsmats
Megintilgangur námsmats er að safna upplýsingum um námslega stöðu nemenda. Þannig fæst staðfesting á hvort nemendur hafi tileinkað sér þá þekkingu, leikni og hæfni sem felst í þeim markmiðum sem unnið er að hverju sinni. Með námsmati fást upplýsingar um námslega stöðu nemenda á þeim tímapunkti sem þeirra er aflað. Þegar upplýsingar úr námsmati eru nýttar með markvissum hætti er meðal annars unnt að styrkja kennslu og kennsluaðferðir til að efla námsárangur nemenda og efla samstarf og samskipti heimila og skóla.
Fjölbreytt námsmat
Námsmatsaðferðir eru fjölbreyttar og markvisst er fylgst með framförum allra barna með leiðsagnarmati sem byggist á markmiðum og viðmiðum um árangur. Dæmi um námsmatsaðferðir eru samræður, hópavinna, hugtakakort, viðtöl, dagbækur, KVL skráning, markmiðasetning, sjálfsmat, jafningjamat, upprifjunarspjald, kynningar, námsmöppur, kannanir, skapandi skil, sýnishorn, munnleg verkefni og gátlistar.
Stöðumat í Mentor
Stöðumat er skráð reglulega yfir skólaárið í Hæfnikort nemenda á Mentor. Í hæfnikorti eru þau hæfniviðmið Aðalnámskrár sem liggja til grundvallar í stöðumati. Skipulag námstímabils er að finna í námsáætlunum. Kennarar skipuleggja í upphafi hvers námstímabils hvaða matsviðmið verða metin í lok tímabilsins.
Matskvarðar
Matskvarðarnir eru settir fram með táknum til að sýna hversu vel nemendur hafa náð ákveðinni þekkingu, leikni, skilningi og færni.
Framúrskarandi: Nemandi sýnir dýpt í skilningi og beitir þekkingu sinni á fjölbreyttan og skapandi hátt. Hann vinnur af nákvæmni, sjálfstæði og sýnir frumkvæði. Nemandinn hefur náð öllum markmiðum og fer jafnvel fram úr þeim.
Hæfni náð: Nemandi hefur náð þeim markmiðum og hæfni sem lögð er áhersla á. Verkefni og frammistaða sýna að hann skilur viðfangsefnið og getur beitt þekkingu og leikni í samræmi við aldur og viðmið.
Á góðri leið: Nemandi er að byggja upp skilning og færni. Enn vantar öryggi eða dýpt í þekkingu. Hann er að vinna í átt að markmiðunum og með áframhaldandi þjálfun og stuðningi er hann líklegur til að ná hæfninni.
Þarfnast þjálfunar: Nemandi hefur ekki enn náð nægilegum skilningi eða færni í viðfangsefni og á í erfiðleikum með að beita því sem hann hefur lært. Hann þarf meiri tíma, æfingu og markvissan stuðning til að þróa með sér viðeigandi hæfni.
Mikilvægir þættir
Mikilvægir þættir eiga sér langa sögu í Vesturbæjarskóla og lýsa lykilhæfni Aðalnámskrár. Mikilvægir þættir eru metnir í tengslum við hvaða námsgrein eða þema sem er yfir allt skólaárið.
Í lok skólaárs fá nemendur afhenta mikilvæga þætti og umsögn frá kennurum.
Sýnishornamöppur nemenda
Börnin vinna tvisvar til þrisvar á ári svokölluð sýnishorn sem kennarar nota sér til aðstoðar við námsmat.
Í sýnishornamöppuna fara sýnishorn af vinnu barnanna eins og af sögugerðar- og skriftarsýnishornum og öðrum verkefnum sem gaman er að eiga. Einnig gera börnin sjálfsmynd í upphafi og lok skólaárs sem fer í möppuna.
Þegar nemendur hætta í skólanum fá þeir möppuna afhenta á útskriftarhátíð 7. bekkjar.