Stefna Vesturbæjarskóla
Vesturbæjarskóli er grunnskóli fyrir börn í 1. - 7. bekk. Einkunnarorð skólans eru virðing, vellíðan og velgengni. Með það að leiðarljósi leggjum við áhersla á alúð, hlýju og áhuga á velferð nemenda og stuðlum þannig að jákvæðum skólabrag. Starfsfólk leggur sig fram við að skapa jákvætt og uppbyggjandi umhverfi þar sem öllum líður vel.
Réttindaskóli Unicef
Við erum Réttindaskóli Unicef þar sem markmið er að námsumhverfi sé lýðræðislegt, börn læri um mannréttindi og tileinki sér gagnkvæma virðingu. Grunnforsendur Barnasáttmálans eru útgangspunktur fyrir allar ákvarðanir sem teknar eru í skólastarfinu og þær endurspeglast í samskiptum allra í skólasamfélaginu. Með markvissum hætti ræktum við færni, leikni, þekkingu og viðhorf sem hjálpa börnum að verða gagnrýnir, virkir og hæfir þátttakendur í samfélagi.
Teymiskennsla
Við leggjum áherslu á samvinnu nemenda og kennara í teymiskennslu þar sem kennarar sameina krafta sína, hæfileika, áhuga og bjargir og bera sameiginlega ábyrgð á nemendum. Fagleg teymi gefa kennurum tækifæri til að þróa og læra í starfi en skólaþróun snýst um að gera skólana að betri stað til náms og þroska fyrir öll börn. Blöndun barna í árgöngum styrkir þau félagslega þar sem þau læra að vinna saman í fjölbreyttum hópi og að takast á við breytingar. Við leggjum áherslu á að skapa nemendum okkar þroskavænlegt- og námshvetjandi umhverfi þar sem öll börn geta notið sín.
Fjölbreyttir kennsluhættir
Við leggjum okkur fram við að koma til móts við mismunandi þarfir barna með því að bjóða upp á fjölbreytta kennsluhætti og námsefni í samþættu námi út frá markmiðum Aðalnámskrá. Kennarar sýna fagmennsku við kennslu og bekkjarstjórn og kennsluhættir eru sniðnir að margbreytilegum þörfum allra barna. Í Vesturbæjarskóla er mikil áhersla lögð á að nemendur læri að vinna saman og sýni hver öðrum virðingu, tillitssemi og umburðarlyndi. Börn læra að nýta margvíslega miðla í námi sínu og efla upplýsinga- og miðlalæsi sitt. Með góðu og faglegu skipulagi kennslu og verkefna í leiðsagnarnámi og stöðugri starfsþróun kennara búum við til gæða kennslu og faglegt skólastarf fyrir öll börn.
Leiðsagnarnám
Löng hefð er fyrir leiðsagnarnámi þar sem börnin velta reglulega fyrir sér náminu með kennurum til að nálgast eigin markmið og ákveða hvert skuli stefna. Leiðsagnarnám er námsmenning þar sem lögð er áhersla á vaxtarhugarfar, sjálfseflingu og námsvitund. Leiðsagnarmat er námsmat sem hefur þann megintilgang að veita nemendum endurgjöf með það að markmiði að bæta árangur. Námsmatsaðferðir eru fjölbreyttar og markvisst er fylgst með framförum allra barna með leiðsagnarmati sem byggist á markmiðum og viðmiðum um árangur.
Skapandi hugsun og frumkvæði
Okkur finnst mikilvægt að efla skapandi hugsun og frumkvæði og að veita börnum fjölbreytt tækifæri til sköpunar og tjáningar í öllu skólastarfinu. Áhersla er á að styrkja sjálfsmynd barna, þrautseigju, trú á eigin getu og hvetja þau til að nýta hæfileika sína í skapandi umhverfi. Í sköpunarsmiðjuverkefnum vinna með börn að hugmyndum og verkefnum sem þau hafa áhuga á, eru þeim merkingarbær og byggjast meðal annars á lausnaleit og nýsköpun.
Efling lykilhæfni
Við leggjum rækt við að efla lykilhæfni nemenda eins og hæfni til tjáningar, gagnrýnnar hugsunar, hæfni til samstarfs, sjálfsþekkingar, ábyrgðar, sjálfstæðis og frumkvæðis. Heimakrókur er í öllum kennslustofum þar sem ríkir notalegt andrúmsloft sem byggir upp traust og öryggi ásamt því að stuðla að vellíðan og opinskáum umræðum. Í þessu umhverfi fá nemendur tækifæri til að tjá sig og læra hver af öðrum. Upplifun hvers barns er einstök og með því að veita hverju barni athygli og rými hjálpum við því að finna hvar styrkur þess liggur.