Leiðsagnarnám í Vesturbæjarskóla
Í Vesturbæjarskóla er leiðsagnarnám þar sem börnin velta reglulega fyrir sér náminu með kennurum til að nálgast eigin markmið og ákveða hvert skuli stefna. Leiðsagnarnám er námsmenning þar sem lögð er áhersla á vaxtarhugarfar, sjálfseflingu og námsvitund.
Leiðsagnarnám
Leiðsagnarnám snýst um að veita nemendum leiðsögn sem hjálpar þeim að ná markmiðum sem þeir stefna að. Markmiðin verða að vera vel skilgreind svo nemandinn, kennarinn og aðrir sem að náminu koma hafi sama skilning á því hvað sé til marks um að markmiðum sé náð. Áhersla er lögð á vaxtarhugarfar (e. growth mindset) þar sem trú er á að nemandi geti þróað hæfileika sína og hæfni með fjölbreyttum aðferðum. Nám er ferli þar sem eðlilegt er að gera mistök og alltaf er hægt að bæta sig.
Endurgjöf, markmið og viðmið
Nemandi fær upplýsingar um stöðu hans í náminu borið saman við námsmarkmið og skilgreind viðmið. Endurgjöfin hefur enga þýðingu fyrr en nemandinn nýtir sér hana og á því alltaf að fá tækifæri til að gera betur. Forsenda þess að endurgjöf skili nemendum árangri er að námsmarkmið séu skýr og að búið sé að skilgreina viðmið um árangur. Viðmiðin segja nemandanum hvenær hann hefur ná markmiðinu. Þannig skapa námsmarkmið, verkefni, viðmið og endurgjöf eina heild. Mikilvægt er að hafa í huga að verkefnin sjálf eru aldrei markmið heldur verkfæri sem hjálpa nemendum til að ná markmiðum og hæfni.